حوار مع المستشار الضريبي
أ/ سامح المصري
التهرب الضريبي ليس شطارة.. بل انتحار اقتصادي
الفاتورة الإلكترونية قضت على زمن الدفترين.. واللي كان بيوفر مليون تهرب هيدفع 3 مليون غرامة وهيتحبس.
في حوار خاص، يفتح المستشار الضريبي أ/ سامح المصري ملف التهرب الضريبي الشائك، ويكشف حيل التهرب، وأسبابه النفسية، وكيف قلب قانون الإجراءات الضريبية الموحد رقم 206 لسنة 2020 الموازين.
في البداية ببساطة، يعني ايه تهرب ضريبي وايه أشهر صوره؟
المستشار الضريبي سامح المصري.أهلاً بيكم. التهرب ببساطة هو إنك تكسب فلوس وتخبيها عن الدولة عشان متدفعش حقها. وأشهر صورتين عندنا هما:
الأولى حيلة **”الدفترين”**، ودي حيلة قديمة جداً. صاحب الشركة بيبقى عنده دفترين، دفتر أسود حقيقي فيه كل حاجة، باع بكام وكسب كام، وده محدش بيشوفه غيره. ودفتر أبيض مضروب بيقدمه للضرائب، كاتب فيه إنه بيخسر أو بيكسب قليل. يبيع بـ 10 مليون ويكتب 5 مليون، ويشتري فواتير وهمية عشان يزود مصاريفه.
الصورة التانية هي **التهريب الجمركي**، وده أخطر. بدل ما تخبي فلوسك جوه البلد، انت بتخبي بضاعتك وهي داخلة. تجيب حاوية آيفونات وتكتب في الورق إنها ورق، أو تجيب فاتورة مضروبة. وده تهرب مضاعف، بتهرب من الجمرك ومن الضرائب مرة واحدة.
الناس بتتهرب ليه؟ هل السبب إن الضريبة عالية؟
المستشار الضريبي سامح المصري.ده سبب من 5 أسباب. آه فيه ناس بتهرب عشان الضريبة عالية، وده ليه نظرية اسمها منحنى لافر، بتقول لما الضريبة تزيد عن حد معين الناس بتهرب والحصيلة بتقل. وعشان كده لما خفضنا الضريبة سنة 2005 الحصيلة زادت 3 أضعاف.لكن فيه 4 أسباب تانية أخطر:
تاني سبب هو ضعف الوعي. ناس كتير فاكرة الضريبة إتاوة، بتقول “هي الدولة بتديني ايه؟” مش شايفة الرابط بين الجنيه اللي بتدفعه والطريق اللي بتمشي عليه.
تالت سبب تعقيد الإجراءات. صاحب محل صغير عايز يلتزم، يلاقي نفسه مطلوب منه 12 إقرار قيمة مضافة و4 مرتبات وإقرار دخل ومنظومة فاتورة وإيصال. فيقول تكلفة المحاسب أغلى من الضريبة، فميقدمش خالص.
رابع سبب ضعف الرقابة والعقوبة زمان. المتهرب كان بيحسبها: هوفر مليون واحتمال اتمسك 5% وغرامتي 1000 جنيه، يبقى أتهرب. دلوقتي المعادلة اتقلبت.
وخامس وأخطر سبب هو عدم العدالة. لما الممول الملتزم يشوف اللي جنبه مش بيدفع ومحدش بيكلمه، بيقول إشمعنا أنا؟ ولما يدفع ومشوفش خدمات بترجع له، بيحس إنه بيتضحك عليه. والإحساس بالظلم ده بيحول التهرب من جريمة لبطولة شعبية.
حضرتك قلت المعادلة اتقلبت.. اتقلبت إزاي؟ والقانون الجديد بيعمل ايه؟
المستشار الضريبي سامح المصري.القانون الجديد رقم 206 لسنة 2020 ده مش قانون ضرائب، ده قانون عقوبات اقتصادية. زمان التهرب كان مخاطرة محسوبة، دلوقتي بقى انتحار اقتصادي.القانون حدد المتهرب: اللي يقدم إقرار غلط، أو يستعمل طرق احتيالية، أو ميمسكش دفاتر، أو ميتسجلش، أو يتأخر عن تقديم الإقرار أكتر من 60 يوم.
والعقوبة بقت مرعبة:
• حبس وجوبي من 6 شهور لـ 5 سنين • غرامة من 5 آلاف لـ 750 ألف، أو 3 أضعاف الضريبة المتهرب منها أيهما أكبر. يعني لو تهربت في مليون هتدفع 3 مليون غرامة غير أصل الضريبة. • وفي حالة العود العقوبة بتتضاعف • ده غير الحجز على حساباتك في البنوك والمنع من السفر ونشر اسمك في الجرايد والقائمة السوداء، ودي بتدمر سمعة أي شركة.
كثير من المتهربين بيقول “أنا بضر الحكومة بس”.. هل ده حقيقي؟
المستشار الضريبي سامح المصري.لا طبعاً، ودي أكبر كدبة. التهرب بيضر 4 جهات:
1. على الدولة: الضرائب 75% من إيرادات الدولة. لما تتهرب، الدولة إيرادها بينقص، فبتضطر تستلف، فالدين يزيد، فالتضخم يزيد، فالأسعار تولع على الكل. 2. على المجتمع: انت مش بتسرق الحكومة، انت بتسرق من ابنك. الجنيه اللي تهربت منه هو اللي كان هيبني فصل لابنك أو سرير رعاية لأمك. 3. على الاقتصاد: ودي الأخطر. التاجر الملتزم بيبيع الحاجة بـ 130 عشان دافع ضرائب، والمتهرب بيبيعها بـ 100 عشان مش دافع. فالزبون بيروح للمتهرب، والملتزم بيقفل. فالسوق بيبقى سوق المتهربين، وده بيطفش أي مستثمر أجنبي محترم. 4. على الممول نفسه: بيوفر جنيه ويخسر مليون وسمعته. هيفضل طول عمره خايف من تليفون من الضرائب، وهينام والملف تحت مخدته.
طيب والحل؟ إزاي نكافح الظاهرة دي؟
المستشار الضريبي سامح المصري.الروشتة العالمية 5 نقط، ومصر ماشية فيهم بقوة حالياً:
أولاً: نبسط القانون. زي قانون المشروعات الصغيرة اللي قال للمشروع اللي بيبيع أقل من مليون ادفع 1000 جنيه في السنة كلها وخلاص، من غير دفاتر. فـ 100 ألف ممول دخلوا المنظومة لأول مرة.
ثانياً: التحول الرقمي. الفاتورة الإلكترونية والإيصال الإلكتروني قضوا على زمن الدفترين وسوق الفواتير الوهمية. مبقاش ينفع تبيع بـ 10 مليون وتكتب 2 مليون، لأن السيستم شايفك لايف.
ثالثاً: ننشر الوعي. نغير الخطاب من “سدد ما عليك” لـ “شارك في بناء بلدك”. نعلم الولاد في المدارس يعني ايه ضريبة.
رابعاً: نحقق العدالة. لما الكل يدفع، بتاع الأونلاين زي صاحب المحل، ولما المواطن يشوف فلوسه بترجع له في طريق جديد ومترو ومستشفى، هيدفع وهو راضي.
خامساً: نسهلها على الملتزم ونشددها على المتهرب. الملتزم يبقى عميل VIP، إجراءاته تخلص في دقيقة. والمتهرب يلاقي حجز بنوك وحبس ومنع سفر. نخلي الطريق اليمين سهل والشمال كله شوك.
كلمة أخيرة توجهها للممولين؟
المستشار الضريبي سامح المصري.هقول مقولة قاضي أمريكي عظيم قالها من 100 سنة: “الضريبة هي ثمن الحضارة”.
مفيش دولة قوية بقت قوية بجيش بس. الدولة القوية هي اللي عندها نظام ضريبي عادل، والنظام العادل مش بيتبني بالمأمير، بيتبني لما كل واحد فينا يقتنع إن الجنيه اللي بيدفعه هيرجع لابنه في مدرسة أنضف وشارع أنور ومستشفى أحسن.
الالتزام مش شعارات، الالتزام هو أرخص وأذكى استثمار لمستقبل شركتك وبلدك.
كان معكم المستشار الضريبي
أ/سامح المصري المحاسب القانوني ومراقب حسابات شركات مساهمه والمصفي القضائي للاستشارات واتس01276565109
Leave a Reply